Agosto: Ipagrokyaw an Sadiring Tataramon, Gamiton, Padanayon: Rawitdawit Nu. 2

RICHARD D. MADRILEJOS

Lyabe sa irarom kan masetera

Nagtext ka, nasa higdaan na ako

“Bngi n k m uli. Plz dnt lk d dor.”

Haen ka daw, nagpapangadyi ako

“Ama niamo na yaon sa langit…”

Gare, naagda ka,

dai nakasayuma, sigurado mauli aga,

kaya an pinto

sakuyang ikakandado,

Alagad, an lyabe,

dai paglingawan,

pirme sa irarom

kan masetera.






.

Agosto: Ipagrokyaw an Sadiring Tataramon, Gamiton, Padanayon: Rawitdawit Nu. 1

NOEL DORENTE
sawodon mo

pwede daw ako na magsugo saimo?
madali man sana ini, kakayahon mo,
kudi no-dai man nanggad
bako ka taga-iraya, bako ka taga syudad.


an payo baga sa itaas, an bitis sa ibaba
sain kita man dumuman dara ta an kabudyahan.
an aram ta, kita, Pilipino, kudi igwang ihapot ako saimo,
kun sabihon mong bako, kasusupgan daw ito?


an payo; katungdan, sa kalamias; kaginibuhan
kun tunay kang aki kang banwang gikan mo
matios mo daw na likayan an aroganteng tiyoon mo?
an gusto mo su ngonyan, habo ka na kang kaito.


simple man sana, bai kuta paglibongon
sa satong kabudyahan, dai ka nang hahanapon
an baybayin , an bahag, giraray satong buhayon.
an luminihis na aldaw igwa pang iaatom.


ano an anom? sa mapa hilngon,
ano an kayumanggi? nata ta papution?
kun tunay nasa puso mo an Bikol
bako ini probinsya kudi sarong nasyon.
*
*
*