Abril 26, 2010

RODA DAIGNRE


Carmelado 


Sa raginit san init
Sa Milagros an namit

Nagprino an guin sakyan ko na dyip
Sa may bintana ako nagsudip
Nakita ko, usad na babaye
Nagrigaton, pastillas de leche
Naghunga ako, “Tiya, tagpira?”
“An usad, kinse,” an sabat niya.
Sa bulsa, haragting san sentimos
Mientras nagtubi an akon lagos
Guin paknit ko an iya nga putos
Guin hubaan ko sin lampin tulos
Sinangsang ko an iya nga unod
Guin gupa hasta nag-abot Balud
Nanamitan ko an iya anglo
Nabulong niya an paha ko

Sa raginit san init
Sa Milagros an namit

Abril 25, 2010

VIC NIERVA


Pagpulî

Eenótan ko an maagahón
tangáning abóton an enot na turáok
kan mga manók ni tatay. Itóng

daí nindá maaaráman
o marirísa na akó nag-abót na
asín nasa laóg na kan haróng.

Eenótan ko an dikít-dikít
na pagliwánag kan langit
asin an pagmatá kan banwáan.

Boót ko na maenot ako
sa pagkaràkarâ kan binúbuksan
na radyo o binúbuklat na diyáryo.

Eenótan ko an enot na gios
kan mga guráng asín mga akì,
malihip tangáning daí makaribaráw.

Huli ta an boót kong mangyári
magmatá sindáng garó kaibá
nindá ako kan nakaáging banggí.


(Hali sa 'Antisipasyon asin iba pang rawitdawit sa Bikol asin Ingles,' Goldprint Publishing House, 2005)

Abril 24, 2010

ISSA REORIZO-CASILLAN

An Kuykoy sa Sirong kan Harong

Sa alimpupuro

kan  alpog na

arina kapino,

tuninong kang

nakakulkol sa tahaw

kan saimong labot.

Pinupurisaw ka pirme

kan aki na idto,

hinahayop an

simong puyo

sagkod magbutwa

an saimong payo.

Dangan pupuruton ka niya

asin ilalaag sa palad

minamate an girok

kan simong mga bitis

asin hinahapiyap an

makagirabo mong kublit.

Nakubanan ka

kan an palad kan aki

biglang guminugom,

asin an langit nagdiklom

an ngimot kan aki

haloy natuninong.

Sagkod nadangog mo

an  bistadong tingog,

hinadoy an aki

magparigos sa sapa

tangarig matukal

an dagta sa hita.

Narata ka sa daga

kan an palad

tuyong buminuka

tulos kang nag irarom

sa alpog na tumtom

nin luha.

Abril 23, 2010

FREDERICK MAURICE LIM

Pinakamasiram na Namit
An saimong mushroom chicken curry

na igwang patatas, tokwa buda gatas

nagparani sako sa terminong gluton,

An lugaw mo na may dakulon na bawang, sibulyas buda
may prawn crackers sa ibabaw na mas nagsisiram pag naglulumoy,

Bulod an hukol sa laog nin sakuyang ngimot

An langitnon pig-aabot.

Sa pininyahang adobong magic meat,

Nangangaipo ako ki kape, tsaa o Sprite pagkatapos
tanganing makapahingalo an tulak sa nag-aging gera nin siram,

Sa vegie spaghetti mo na nakua an namit
nin pasta na may karne,

nalilingawan ko an ngaran ko.

Baad mas masiram an daplos mo mantang nagluluto ka,
an saimong kurab mantang an kutsara nagbibiyahe sakuyang ngimot,
an saimong silensyo pagkatapos nin sakong pagnguya,
an pagsabatan nin liwanag satuyang mga mata sa paghiling ko saimo.

Ahh, pigsunod mo garo an taramon nin mga gurang
na an sakong tulak an tinampo paduman sakong puso,
nakaduman ka na padaba
bago mo piggiris an mga bawang buda sibulyas,
nagsasaud ka pa sana,
yaon ka na digdi.

Abril 22, 2010

IRVIN PARCO STO. TOMAS


O Duros!
Sa mga
oras, na iká hinahapò
kokosogán ko
an sakóng paghángos
tangárig daí nindá madangóg

pag nagtonínong na
an gabós, sasabayán
takáng maghángos
nin makosóg
kugos-kugos

padágos na kokosogán
an paghapíyap
sa saímong daghán

hohopogón an kosóg
na mapapósog
kan saímong pusò

isusumpáy iníng hinángos
sagkód na maampós
an saímong pagmàwot

sagkód na sakóng maparóng
an mahamót mong amyó
sa maimbóng na huyop
o duros!

Abril 21, 2010

KEVS DE QUIROS


Kanser


Dai na ako maturog asin mapasaluib sa birtud kan banggi. kadakol na an nasulsog sa rarom kan diklom, nautbanan hinangos, dae na nag gios;. Dai na ako maturog ta sa siring na paagi, mababanga an oras na tinada para sakuya.

Sa katahawan kan pagiiwal kan diklom asin liwanang, sa sakuyang kawaran nin pagmate sa palibot, ako napupukaw kan kahandalan sa pagpaaram asin pagrakdag kan mga buhok sa sakuyang bumbunan.

Kun ako hahaputon kun ano an oras, ako minapugol nin hinangos, nagbibilang nin sakuyang mga muro, mapundo asin maistorya kun pa'no mas kadakol an sakuyang kwentada kasuodma asin kan sarong aldaw.

An mga kaputikan na ako madanay pa sa kinaban iyo an lason na uru-utrong linalaog sa sakuyang kalag.

Kun pa'nong muya ko pirmi sanang nakasarado an sakuyang pintuan, ini huli sa duwang rason. Primero, huli ta habo kong may nakakahiling sa sakuyang lawas na ginugurumos kan sinasapar na kadaihan. Panduwa, ta habo kong mag-laog sa sakuyang kwarto nin mas amay an Kagadanan. Huli kaini, an pintuan an sakuyang paglaom.

An sakuyang kalag haloy nang nailubong sa daga puon kan ako bayaan kan sakuyang mga namomotan - kan sakuyang mga namomotan, bako kan pagkamoot.

An sakuyang lawas haloy nang binayaan nin sakuyang pagtubod na maabot an aldaw na dae na ako mahahandal na sa tahaw kan sakuyang paglakaw, dae ko na bibilangon an sakuyang mga hakbang.

Mayo na akong pagtubog - kun igwa man, pagtubod na ining maaging banggi, saro na sana sa mga dikit na natatada para sa sakuya.

Abril 20, 2010

DEXTER BOX

Himno kan Pawawarang Aldaw

Kamunduan an nakalukob sa misteryosong buhay

Bihira siya magpaaram, anino pirming nagpapahiling

Arog kan bayong an salog kan kalangitan habo magsuway

Sa gayon buda hapiyap ni Hading Aldaw biyo napapakiling

Nagsisisid sa mahiwas na panganoron, independienteng tunay!

Mantang mga nilalang sa kinaban nagkakaduruling.

Nagsosolong nagtutukaw sa kuwartong pagmati kulungan

Pigmuni-muni an mga tuminumbang madugong aldaw

Na arog kan tinaong giyera ni Ares sa suklob nin kadikloman.

Hinahapot an sadiri kun nguarin siya matutunaw,

Ginigibo na sanang Inspirasyon, matibay na tuntungan

Pasiring sa maliwanag na paduman na warang makakaagaw.

Marhay na plano itinindog pero luminagapak buda nahulog,

Para sa namomotan, an pangitorogan tuminiklop na.

Pag-asang naglibot natunaw arog kan bulan na naglubog

Duman sa maogmang harong na pigdadagosan niya baga

Na garo natatakot sa kikilat buda makosog na dalogdog

Nangingibabaw na emosyon pirming namimiyesta.

Kaogmahan asin kamarayan ay estranghero sa mauyong puso

Logod man makabuhi sa mahibog na kadenang lansang

Na nagpapatios, nagpapapiot sa tikab niato

Hagad man sana na kun umuran ay may magsagang

Maski sa tahaw kan delubyo sinda magharayo.

Ngani mapapait na pangyayari dai na magin tugang.

Oras padagos na naglalakaw na daing pakiaram

Mga kristal na bitoon nakikiusyoso, biglang minasolnop

Garo bulawang bilog sa daing katapusang langit nagtataram,

Pagal na sa pagkawat, kairiba an paros na ladop ladop,

Dahon ganadong nagbaraylehan na pig-aabot ki kasiraman

Kaya si Poseidon nagpasyar, sa dagat nagpahoyop-hoyop.

Kairiba an lumang plawta, sinukbit an gitarang naghahalat.

Paboritong melodiya uminalingawlingaw, tuminogdon sa palibot

Pinikit mga mata ta garo may ispiritu na nagkakalat.

Kan madangog an piyesa an kinaban uminikot

Pero nailobong tolos sa Bolod nin Kagadanan na dai man dapat,

Klasikong krisis an dating nagkakaway ay suminaklot.

Panahon ay pinaghahadean ki sobrang pasakit.

Nguarin kaya matatapos? Kun an tubig surupon?

Kun an burak dai na magbuka? Kun an kalayo dai ng init?

Kun an instrumentalista manhid na? O gabos na oripon?

Pangadye sa Kaglalang na maski segundo dai magpikit

Ta ang bangungot imbwelto baco man harayoon!

Abril 19, 2010

EDUARDO UY, JR.

pagbwélta

dirì nagbabág’o

an binílin.

pírmi lang iní mátinir

na nakapúndo

mántang dirì pa nákauli

an nalalagálag.

sa awát na nakabulág,

uukíton sin pangirumdóm

an dáti na kórti

sin kinadakuán.

ipipintúra sa matá

an nakaági na bitbít pa

sa nagnipís na gúrit

sin duwáng kíray.

pag írog siní,

wara mababág’o

sa pag-abót.

pwéra sa kusóg sin rúyag

na káya ipírit

sa urú-útro na pagtapô.

Abril 18, 2010

Dai ko na aram ang masunod

Noel R. Volante

Pagharani na ang Summer,

Mabantay kang bulanon,

Auto papadalaganon,

Ang Magtabid tutuyuhon.

Bago maghale,

Maparibay aba-reinte,

Kung medyo sinusuwerte,

Asiring-kuwentang labi-labi

Pag-abot sa baybayon,

Maparisang may darang balon.

Iluluwas mga kakanon asin inumon,

Mga suro-solterito papaypayon.

Ara-atyan pa,

Kanya-kanya na sindang guyod,

Saro-saro mapalipod,

Igwang mas trip talikod,

Ang iba mas gusto, luhod.

Dai ko na aram ang masunod.

Abril 17, 2010

Naguula an langit

Richard Madrilejos 

Naguula an langit

nagbabagrat ki sakit

botod an inaradong higdaan

tunaw an turog na kapisogan.

An aldaw dagit

nasa tuig an init

higdaan baratakon

pananom tagiltilon.

Abril 16, 2010

Isko Candaza

Siisay an Uragon?

Ini an istorya na sakong tinipon sa haloy na panahon

Sakuyang hinalungkat sa kalot,nakatago sana sa kahon.

Mga ugaling lapa; haloy ng namamarong pano mabata

Ngane maaraman mo dai ka kuna magtiwa-tiwa.

Kan inot kadakol kami barkada maisipon

Mga ugali sa mantok, gari mga patal na mga upon.

Lalo na pag nag- iriba an gabos baga mga mahambog

Uragon asin mga maiisog pero nata pirme may ludog.

Yaon an manlaenlaen na istorya na puro sana paros

Garo man sana baga bagyo kun itamaan natataros.

Siya an uragon! Siya an madunong! Siya an gabos

Kaya kami mga uripon huni digdi sa gilid makilimos.

Bago mo ibuka an ngimot dapat mong pag- isipan

Ngane dai ka nanggad makaraot sa pag-iribanan.

Habo mi man kan rebok, dai mo kami pagpiriton

Baka mahiling mo kon siisay talaga an uragon.

Dai kana maghalat na malastiko ka pa sa payo

Aram na kan gabos an saimong nakatago na sekreto.

Bago mo maheling an muta kan ibang tawo

Hilingon mo kuna kun may muta an mata mo.

An luho kan sadit na dagom saimong naheheling

Pero an luho kan patok ika baga naduduling.

Aram mo nan istorya kan mga tawo sa barangay

Pero an saemong buhay, nata saimo bagang piglikay?

Abril 15, 2010

Bobon  

Welbert Cipria

Sakong pigagihan an lubak-lubak na dalan
May haralangkaw na kolod
Asin igwa man nin katanayadan
Alagad an kapalibotan

Marambong na kaawotan.
Mantang ako nasa paglakaw
Garo baga ako ulod na dangaw-dangaw
Diri-diritso mantang luway-luway
Na an pigagihan may gabat na namatian.
Sa kahalawigan kan sakong piglalakaw
Sakong lawas garo na bagang atop
Na linandag sa aldaw,
Ini bako man na kalinturang reaksyon
Sa paglaog kan microorganism
Sa sakong lawas

Kundi ini an init

Na sugo kan sakong hypothalamus.

Tukadon asin katanayadan
Sako nang inagihan,
Ngonian kaipuhan
Maglugsot naman

Ta an bobon na sakong toyo
Sako nang pigdungawan.
Init na sakong namatian
Sinabayan pa nin gatol
Na dai masabutan

Mas magatol sa kagat nin lamok
O hibo kan kaawotan..

Kaya dai ko na ngonian hahalaton
Na ining bobon humobas,
Hihigopon ko na ini

Tibaad ini an makarahay Kan sakong namamatian.

Abril 14, 2010

Ipinagtimpla mo ako ki kape
Giovhanii C. Buen

An tasa dae mo pinano,
Ta an sabi mo baga
An mapano kaini--
pagkamoot mo sako.
An init kaining kape
Dae nakakapaso,
Dae nakakadalso,
Arog kan init sa mauran--
kan pagkugos mo sako.
An aroma kaining kape
Mahamot na sakuya minapukaw,
Arog kan paghadok mo sako
Para ako pukawon--
sa pagpoon ki aldaw.
Pero ining kape--
na pirmi mong tigatimpla sako
Dae pa man minadoot sa sakuyang ngabil
Namit na an hamis,
Ta sa pagtao mo kaini sako
Ika sincerong minahiling buda minangirit.

Abril 13, 2010

Mayon

Noel Dorente

dai ko man mahapros
an saimong pandok,
iluwas mo sana
padalihigon mo.

dai mo sana pagdugangan
ki saro pang kalag,
akong nakalubong nang
magmamansay
sa saimong kagayunan.

sagkod man,
kun ika madagit,
no dai nanggad na mapugolan,
ikurahaw mo...
ibatas mo an kaanggotan
sa tubig
sa dagat
sa kaparusan,
ta no-ako kaan an
makinabang,
gigibuhon ko an ladawan
na magbabalaog ki hadok,
magdadanay man giraray
an marhay mong dangog,
sagkod sa mga suksok
na dai pa naaabot.

no-ika man tumurog na,
magpahingalo
mabalos.

liwat yaon an
mahayahay na hinangos.

sa otro no-lumuha ka
no-humaya gibuhon mo,
iyo sana an maka-uraw sa gabos
an magpamati kang dai ka
na mahihiling otro.

giraray maglugo-lugo ka
na no-mag-alintuto dai ka sana mapinaw
sa paghiling ko.

Abril 12, 2010

Mirindalan sa tig-uran

Adrian Remodo

        

   Iyan        

  saimo       

   dila,         

   lukadon.  

        

   ay, 

  batag        

        

   an  

  sako,        

   saba,       

   tulos        

  iayon,       

        

   luyat        

  pa   

   alagad     

  hare

  ka,  

        

   uya

  an   

  hal-­‐o,   

   maitom,   

   ika 

        

   lulubakon,         

        

   lubang     

  mo  

   nganga,   

   kinaban   

   magaya‐gaya.  

           

Abril 11, 2010

Kuhol

Bernardo Miguel O. Aguay Jr.

 

An mga kuhol kun tig-init

Minauriod sa irarom kan laboy

Kun saen dai na maabot

Kan pag-gatak kan daga.

Duman sinda mabubuhay sa diklom,

Sa lipot kan lapok.

Asin sa pag-abot kan panahon

Nin tig-lipot

Mahihiling mo giraray sinda

Nagbubotwa saru-saro,

Luhay-luhay

Sagkod na mahiling mo sinda

Palna na!  Dakulon na!

Nakausop sa lanob

Kan ba-sog

O sa paroy na pupuhoon

Nakakurapot

Inuubos panguson

An dugta kan tinanom.

Dawa saen may kuhol

Sa sa-ud, sa simbahan,

Sa eskwelahan, sa sinehan

Nahiling ko nakadukot sinda sa lanob

Kun saen madiklom

Inuubos panguson an dugta

Kan matapong muhon.

Abril 10, 2010

Mayon, 115

Rose Alibin

o

                                                       Mayon

                       maray ngani na

                                         nagluwas ka ngunyan

                                    na hapon bago magbanggi ta

                            nagbagyo baga, paghuna ko napara ka

                     na, dai mo man lamang nahiling su nagralayog.

Abril 9, 2010

Microbio

GB Calleja

Sadit-sadit sana,

Alagad uragon.

Pag nadadagit,

Lintian, noy,

Maka-uragon.

Abril 8, 2010

Pagmawot

Jun Balde

màwot ko pa man daw

pagkugos-kugoson

ikang pighihidaw

paghulid sa hapon

ta nugad may pùngaw

digdi sa irarom

na habò maghuraw

ano man gibuhon

alagad matanaw

ka minsan sa diklom

tulos mapupukaw

an sakong paglaom

bulong sa purisaw

an saimong imbong

mundô matutunaw

kun ako kugoson