Bunyag
Ben Escoto
An kabusugan sa linusak na kamoteng kahoy
Na kanina pinamahawan
Madali mawara sa sugad sini na bat-ang kapulot,
Binabayo san mabinhod ko na rapadapa
Ngani maabot an dati na agunan
Na naghuhulat mapailihan.
Hanggan sa kabutngaan san amo dalan
Nabati ko na lang an mga dalugdog,
Tulos kami darapaan
ALAS DOSE!
Karamangan . . .
Bigla na lang tunaraas
An manipis na kagabunan.
Deputa, mao na ini!
Nakatingol, nakabungol,
Bigla nawara an mga suksukan.
Dapat ibalik an dalugdog!
Nalimutan ko na ako intatakigan
Sa puro pulbura na nasinghot,
Unambus sa ako dughan.
Luwas an dila ko
Sa paatras, patalikod na daralagan
Pagpundo mi, nag-iristoryahan
Salamat kay sa amo
Wara man grabe na tinamaan.
Habang hinihigop ko an kape sa payag
Nadilsuan an ako ngaragngagan
Pero nakasulod man an kalayo
Sa ako wara sulod na tiyan.
No comments:
Post a Comment