Agosto: Ipagrokyaw an Sadiring Tataramon, Gamiton, Padanayon: Rawitawit Nu. 5

ADRIAN REMODO


Mirador

[Mirador-Jesuit Villa] began as a meteorological observatory, with Jesuit scientists puttering about measuring rainfalls, observing winds, recording the shiverings of the earth, quietly, patiently opening the windows into the physical universe. –H. de la Costa, S.J.

Daghan ko an kalangitan—
matea an mga bitoon na nakawarak
sa kabilogan kan sakuyang daghan,

minagiya sa mga mapungaw na perigrino
nin mga dai nababalukat na pagkamoot.

Kun nanggad mahiling mo an pagtiripon
kan mga uranon na panganuron

sa pag-ultanan kan sakuyang mga suso,
patubudon mo an saimong puso,

ngunyan an enot na uran kan Mayo,
simbag sa mga tuninong na pagngayo-ngayo. 

Bakong boses nin Diyos an sakuyang daguldol.
Pagtakig ini kan sakuyang daghan 

huli sa mga paabot na katibaadaan—
paabot an pagkamoot, tibaad mahayo

kan daing-ugaling kikilat na minakilhag
kan saimong hirilangon na puso. 

Daghan ko an kalangitan—

yaon digdi minaandam sa saimong pag-abot
an mga koro kan mga angheles,

magpamibi, mag-atang tangani na makaabot
ka sa daing sagkod na kaogmahan,

huli ta sa oras na itinilaan,
lilingawan mo an kinaban,

digdi sa sakuyang daghan, ihuhungko
mo saimong paladan na lalawgon,

dangan ika mataram: mga daing sagkod
na karangahan asin mga kapaladan.












.