Agosto: Ipagrokyaw an Sadiring Tataramon, Gamiton, Padanayon: Rawitawit Nu. 26

VIC NIERVA


 Duon  
 
DIGDÍ ka. Dagos na. Sige na,
gilídan ngùná 'yan mga burak
na tinaó nindá saímo ta bakô
man ikang istátwa kan Mahál
na Birhén na binábasang-básang

kan mga solterítong iyán na
daíng ibáng naáaráman
kundî an magkáwat saná kan
mga badíl-bádil na regálo
kan saindáng mga inâ

kan Paskó. Dagos na. Daí ka
mag-alangán. An taróm kan hilíng ko
bakô nanggád para saímo kundî tangáning
alawón sindá pasíring
dumán,                                     sa harayô. Dagos.

Sige na. Dagos na. Daí ka na
nganì magngalás diyán sa antígong
pintúan saká sa bronseng siradúra
na 'yán. Nagkabarakál ko 'yan
mga 'yan sa inot kong suwéldo

sa unibersídad. Halóyon na idtóng
marháy—daí mo 'ko pagngirítan.
Dagos. Tukáwi bayâ, diyán,
d'yan sa kolór-lúmot na sofá
na pinilì kan inot kong nobya—o

agómon?—para sakô, para digdí.
Ay, ta sa ibáng aldáw ta na sindá pag-
uláyan, iyó?                           Iyó,—hahaha!
—sige saná—sagkód matíon mong
akò ka digdí. Daí ka ninigaran

sa sakúyang haróng, dawà patong-
pátong na an mga pintúrang ikinolór
sa lanób kainí; tadtád naman patí iní nin
mga pakong sàbítan badò, kalsón, paha,
kopyâ, kuwádro, kadákol pa. Daí taká

ngùná tatàwán inómon, atyán na; na-
mirindál pa saná man kitá, saká malípot
iníng pagkahápon. Anó ta daí naóontok
an huyom mo? Akó o iníng haróng ko?
Ay, kuahá na an libró ta adálan ta na.

Kun gustó mo, hubáa ngùná an sapátos
mong nagrorósas arog kan saímong
mga ngabil, tangáning mahayaháyan ka.
Saímo ngunyán 'yán sakóng sofá.
                                                  "May anghél,"

sabi mo kan biglá kitáng nagtunínong.
Nagsabátan dagos an satóng mga matá. "Iyó,"
sabi ko, "totóo an anghél na 'yan," kasabáy
an paghúyom. "Bayáan taká ngùna, ha."
Linamág      mo      pa      akó      nin      hilíng.

Nagkákaidád na an inómon mong nasa pitsíl,
igwá nang hapín-hápin na yelo, manàgóm na
an rinúnot na sitrús asín mansánas. Tamang-
támang panápos sa saímong pagbása, huli
ta mapapahà ka                         kaiyán.


24 Agósto 2011, Siyúdad nin Naga