Myra C. Rapsing
GINAHIDLÁW AKÓ
Sa hutík sang narra
Kun gab-i, samtáng
Ginaduyan siní ang mga sal-íng,
Sa libagon namon nga sulóg
Nga ang pamalò amo ang nagapukaw
Sa amon kon kaagahon,
Sa pagbinaisay sang duhá
Namon ka idô kon diin sa ila
Ang mauná magkaon sang panyaga,
Sa mahipos nga mga tinagâ
Sang isdâ sa subâ nga amon
Ginapaliguan kag ginalabhán,
Sa pagsiniyagit sang amon
Mga pato kay ginatiid silá
Sang kuríng sang pihák-baláy,
Kag sa gahod sang mga ilagâ
Sa amon nga kusina samtáng
Ginakitkít nila ang mga sako
Sang humáy—
Ginahidláw akó: bangód
Dirí sa evacuation center,
Ang akon gid lamang
Mabatian amó ang mahipos
Nga singgít sang abuhón nga hangin
Pagkatapos nga nagngurob
Si Mayón kag nagpatulò
Sang iya nagabaga nga laway.
No comments:
Post a Comment