Agosto: Ipagrokyaw an Sadiring Tataramon, Gamiton, Padanayon: Rawitawit Nu. 24

LENI VALLERIANO

Iluy-iluy*
i.
Pigpupurot mo kun nagkanugad an mga dahon kan aldaw
na nakaagi,
an raging na halakhak kan saimong pagkaaki
na kayang magtaklub
sa saimong nagdidiklum na pagisip
kun pano magpahulpot ki makakaon
kan saimong mag-ina.

Pag halaba an aldaw,
Iluy-iluy an paborito mo kaitong kawat
na minatukdas sa iraya pasiring sa ilawud.

ii.
Pigpupunas kan saradit mong tumak an nakabalandrang
sikretong banga sa dalan kan saimong baryo,
kan mga may-igwa asin dai.
An alpog na minadukot sa saimong angog
nagkukorteng krus, dugi na masalbar
sa saimo tangani dai ka mawara,
pagagi sa may higanteng pili
naninilo nin liog.

Tinandaan kan haraphap mong bitis an mga agihan
pasiring sa kuru-kadlagan
nin mga batag asin kabute, nin mga berdeng gulayon,
kan masakrap na mga dahon
na nagwawalat nin dagta o kun minsan saluksok
sa saimong guramoy.
Hilera nin lakbog na bayawas pagkatapos
asin linsa, uraro kataning an berdeng balagon
kan kamoteng tagaligtas sa pamanggihan
sa palad nin tikapo.

Pagluksot kan bitis mo sa palitada,
na sentro kan pambangging mga engkantada,
an tandanan sa kaakian nin supas na turutalinga
matapos maganduyog sa aurora
para kay Nuestra Señora de Salvacion.

Diretso eyu an dalan sa puerta nin baybay nin Alola,
kan pulang dagat na minalansa sa takla kan mga lantsang
nakakua nin estada sa Mayon Docks.
Sa ilawud nagkukurahaw an mga tawo,
daing tawas o hilot ni Tya Kadying an makakarapas parayo
sa aninong minaluok asin nagkakawat sa sintido
kan mga aking nalamos sa tubig kan meningitis.

iii.
Iluy-iluy an nagtugdo saimo na daing sirbi
an muhon, na kayang maglumpat
sa natad, riprap, salug, kadlagan
gamit an pakpak nin sadit na mga bitis kaiba an saimong mga kaapil,
pasiring sa teritoryo kan taya,
gwardyadong tumakan na gapo
sa natad na pano nin kalibubog asin gumamela.


*Sarong kawat na garo tumbang-preso, pero imbes na lata, gapo an gamit sa kawat na ini,
asin dapat ubuson na madakop kan tayang grupo an gabos na kaapil sa balyong grupo nin paradalagan tanganing makakua ki sarong punto sa saindang pabor.