Abril 7, 2010

Bunyag

Ben Escoto

An kabusugan sa linusak na kamoteng kahoy

Na kanina pinamahawan

Madali mawara sa sugad sini na bat-ang kapulot,

Binabayo san mabinhod ko na rapadapa

Ngani maabot an dati na agunan

Na naghuhulat mapailihan.

Hanggan sa kabutngaan san amo dalan

Nabati ko na lang an mga dalugdog,

Tulos kami darapaan

ALAS DOSE!

Karamangan . . .

Bigla na lang tunaraas

An manipis na kagabunan.

Deputa, mao na ini!

Nakatingol, nakabungol,

Bigla nawara an mga suksukan.

Dapat ibalik an dalugdog!

Nalimutan ko na ako intatakigan

Sa puro pulbura na nasinghot,

Unambus sa ako dughan.

Luwas an dila ko

Sa paatras, patalikod na daralagan

Pagpundo mi, nag-iristoryahan

Salamat kay sa amo

Wara man grabe na tinamaan.

Habang hinihigop ko an kape sa payag

Nadilsuan an ako ngaragngagan

Pero nakasulod man an kalayo

Sa ako wara sulod na tiyan.

Abril 6, 2010

An Aking Ibinahog An Saiyang Kamot


Kristian S. Cordero

Ipinambahog kan aki an saiyang kamot

tanganing an uwak saiyang madakop.

Kinugos tulos an bagong ataman

dinangdang sa saiyang daghan

Ipapaara niya ini sa kinaban—

Kan may nakasabatan siyang gurang

na tulos man siyang hinapot:

‘Anong nangyari sa saimong kamot?’

Nagsimbag an aki na kinakan na ini

kan saiyang bagong ataman. Baku man makulog.

Dai ngani nagdugo.

Ini an sabi kan gurang: ‘Kakaipuhan mong

bahugon an ataman kan saimong mata.

Pagkatapos nin tulong bulan, hahagadon

kaini an saimong tulak, dangan an apdo.’

‘Pigpapatakot mo lamang ako,’

simbag kan aki.

‘Mas orog na makinakan

an takot na inaataman.’

Nagsisiyap na an uwak, asin nagrarakdag

an pirang balukag kan makasabatan niya

an sarung aki na dai man na kamot.

Hinapot niya ini: Hain an saimong gamgam?

May gurang akong nakasabatan asin kinakan

an sakuyang gamgam, habo ko kutang itao

kaya lang riribayan niya daa nin bagong puso.

Tuminugot ako sa kondisyon na itinao.

‘Ta na pa’no an saimong puso?

Anong hayop an binahog mo kaini?’

Hapot kan aking may gamgam.

‘Kan buminatluy ako sa pinapangalad na salog

kun sain naglalayog papuli an mga nadakop tang gamgam

pati an mga kalag kan mga nagadan sa satuyang pangataman—

duman sa aagihan mo pag-abot mo sa puro

nawara na sana bigla an sakuyang puso.

Nahulog na sana sa labot nin kawaran o napukot.

Kinakan na ini kan hayop na duwang payo

an daing pakilabot, an daing pagkatakot.’

Abril 5, 2010

Abril 

Wilmer S. Tria

Tagdo nin tubig

Danay nagbulos

Garo burabod

Pasiring sa sulong

Sagkod nagin salog

Sa tahaw kan desyerto.

Nakangirit

Maginhawa

An lawog kan byahero

na pagal, naghigda—

nakaturog

sa tahaw kan desyerto.

Abril 4, 2010

An Rawit-Dawit O Kun Ano Ini 

H. Francisco Peñones Jr.

Sinasakdo ta an dagat sa pasan tang balde

pirit na ilinalaog an kahiwasan sa kabilugan kaini,

iniisip na an asgad digdi kabaing nin luha,

an rarom nin kamunduan lawod na kahampang na pampang.

Alagad, tano ta tataan nin pagmate an kinaban?

An hinuhunang kagadanan kan saldang

kun minatunton sa sulnupan yaon sana man

sa payo, puso asin isip nin  tawo talaga an nagtatao

kaini nin kahulugan.  Dawa daing pagkaaram

sa aga masirang asin masirang an saldang.

Pinatood (pinatubod?)  kayang an nasa laog sana kan lata, an awit.

Garo bagang an tubig na naglipwas bako nang tubig.

Mantang an awit an dai nasasalod sa burabod,

an nauula, an padagos na nagsusulog,

bakong idtong isinusuksok sa satong hutok kan mga paratukdong

nagaarog man sana kan mga inaako asin rinorokyaw,

o kinokoronahan na mararahay

Orog pa digdi an awit, orog pa sa mga tataramon

na minataong laman kaini, arog kan balde sa tubig.

Ini si mga maski dai nasasayod, alagad nadadangog.

si mga dai nadadangog, alagad nasasayod.

pirme, mas o menos, pa sa sakong sinasabi.

Abril 3, 2010

Close Open  

Jusan Misolas

close...

open..

itinukdo ninda

sakong kuguson

an duros,

close...

open...

asin kun

nuarin

bubutasan ini.

Abril 2, 2010

Kalag sa Rumpag na Harong 

Marne L. Kilates

 

Kalag sa rumpag na harong an paggiromdom.

Nalibong sa mga kalye, inabutan nin banggi,

Nag-uuyog, naghahanap saimo sa diklom.

Sa mga bakanteng lote, mga bintanang tikom,

Pagdurudûngaw, pasurosîrip na uminagi:

Kalag sa rumpag na harong an paggiromdom.

Ing-ing sa barisbis, karampag sa sagurong,

Sarosong luminaog, garo ginalpong na tagiti,

Nag-uuyog, naghahanap saimo sa diklom.

Sa kurahaw kan odto, sa pagkiat kan sinarom,

Minaabot, minalâbos na daing pasabi,

Kalag sa rumpag na harong an paggiromdom.

Hain na ngani an mga kamidbid, may gigidom

Pa daw na mamâwoton, masabatan na ngisi?

Kaya nag-uuyog, naghahanap saimo sa diklom.

Ay, daing pahingalo an mga agrutong

Kan siyudad, daing katapusan, daing pirmi.

Kalag sa rumpag na harong an paggiromdom.

Nag-uuyog, naghahanap saimo sa diklom.

Abril 1, 2010

Kaidtong Panahon kan Dagom-dagom 

Merlinda Bobis

kaidtong panahon kan mga dagom-dagom

kaidtong mga hapon na nalingaw

sa pagpiyong kan mga turog-turog,

kaidtong paginat-inat kan ikos sa balkon,

kaidtong haloy-haloy na panghalat

sa malipoton na tônog,

garong daeng kagadanon,

garong daeng banggi.

daeng patod an paghangos kan burabod,

an paglila kan milflores sa saiyang tampi,

an paghamot kan bayawas na rakoy-rakoy sa poon,

an paghamis kan biriran na may bunga pirmi.

garong daeng kagadanon,

garong daeng banggi.

yaon an pagtilad-tilad ki manatokon na pili,

an paghanap-hanap ki tungaw-tungaw o kurumbot,

yaon an pagkurukutkot ki sasapnaon na kamote,

an paglubak-lubak ki masapogon na galyang o ube.

garong daeng kagadanon,

garong daeng banggi.

alagad, dinakop ko an mga dagom-dagom,

dai tinugotan na maging hustong gurang,

ilinubong ko an rarom nin boot –

inilayog ako kan estrangherong doros.

kaya naghubas an burabod,

an gabos na milflores dagos na nagabot;

an hamot, an hamis garo bagang inanod –

ay, nagpapataw-pataw na an sakuyang boot!

hona ko daeng kagadanon,

hona ko daeng kadikluman.

ngunyan, nagtitilad-tilad ako

para sa kakanon kan iba,

naghahanap-hanap ki dolyar sa disyertong dalan,

nagkukurukutkot ki bulawan sa harayong mina –

nata garong pigbabayo an sakuyang daghan?

hona ko daeng kagadanon,

hona ko daeng katapusan.

luhay-luhay napapatod an sakuyang pulso,

naaalang an lati na nagberde sa nguso –

dae ko maipaliwanag nin husto –

ay, napuputot an bayawas sa sakuyang puso!

-       Pag-uli, Pag-uwi Homecoming, Manila: UST, 2004

ANTABAYANAN NGONIAN NA ABRIL 2010